Imaxe: DAVID VALIENTE.
Non se lle puido pedir máis a un debut de Copa tan ilusionante como esixente. O Deportivo Liceo venceu ó Caldes nos primeiros cuartos de final presenciados polo Joan Ortoll de Calafell, pavillón testemuña dun marcador probablemente enganoso tendo en conta o visto na pista. Non impide o pase a semifinais dos homes de Juan Copa (sábado 4, 18:30h). Agardarán Noia ou Voltregà, protagonistas da outra eliminatoria.
Antes de todo o que chegou, que non foi pouco, unha pequena adaptación á competición por parte de ambos. Cinco minutos sen apenas ocasións ata que, de súpeto, os dous porteiros deberon actuar en sendos mans a mans. Abriron a veda das oportunidades e o Liceo a dos goles.
Ós nove minutos da eliminatoria marcou Dava Torres, listo ó aproveitar o rexeite dun disparo lonxano de César Carballeira. Tres despois, o dorsal 5 dobrou a vantaxe coruñesa (2-0) nunha xogada tan impresionante como pouco habitual dentro do seu repertorio: agarrou a bóla, avanzou en xogada individual, superou a tódolos rivais que se atopou e superou ó meta Jordi Pons polo seu pau curto.
⏱️ ¡𝗙𝗜𝗡𝗔𝗟! ⏱️
¡¡¡El 𝗗𝗲𝗽𝗼𝗿𝘁𝗶𝘃𝗼 𝗟𝗶𝗰𝗲𝗼 es el primer clasificado para los semifinales de la Copa del Rey de Calafell!!! 🔥
🏑 @HockeyClubLiceo 7-2 @chcaldes #CopaOK pic.twitter.com/MMhnAguVJh
— RFEPatinaje (@FedPatinaje) March 2, 2023
Necesidade de control
Excelentes novas que mitigou o Caldes con outro gran gol. Instantes despois do anterior, Roger Presas gañou a Martí Serra cun intento lonxano có porteiro liceísta non puido prever.
Pouco ocorreu nos intres posteriores a esta inauguración múltiple do marcador. Os homes de Juan Copa superaron ben o extra de motivación dos esta vez visitantes, controlaron unha vez máis o encontro e devolvéronno ó seu terreo. O resultado deste proceso foi o 3-1, obra do capitán. A súa segunda diana particular veu tras levantar a bóla, rematala no aire e superar a Pons.
Unha segunda metade caótica
Se o primeiro acto deixou minutos moi concretos de acción, o segundo foi todo o contrario. Pasaron cousas constantemente. A primeira ós dous minutos, cando Marcos Blanqué viu o cartón azul e mandou a Àlex Rodríguez ó punto da directa. O gol non chegou. Pouco despois si. Fíxoo Arnau Canal (4-1, min. 30) a pase de Bruno Di Benedetto e tras finiquitar unha excelente contra grupal.
O 4-2 de Roger Presas deixou os mellores minutos do Caldes, posteriormente anulados polo tanto de Àlex Rodríguez
No minuto 39, a once do final, ocorreu o mesmo con diferentes protagonistas. O amonestado foi Sito Ricart, o lanzador que fallou tivo o nome de Blanqué e o anotador posterior o de Roger Presas. Disparo lonxano que desviou involuntariamente Bruno. A xogada que deu pase a outro dominio do Caldes de Eduard Candami e a uns complicados minutos liceístas.
Sen embargo, un erro dos cataláns en saída de bóla ofreceulle a Àlex Rodríguez a oportunidade de rematar ese control. Non a desaproveitou e oficializou o 5-2. Un golpe de efecto importante que o Caldes non alcanzou a remontar. Tras un lance no que Roger Presas viu o cartón vermello, encaixou dous goles máis mediante César (6-2) e Bruno (7-2). Bocina e cuartos de final verdibrancos.
FICHA TÉCNICA
DEPORTIVO LICEO: Martí Serra; Bruno Di Benedetto, César Carballeira, Dava Torres, Àlex Rodríguez (quinteto inicial), Sito Ricart, Pol Manrubia, Arnau Canal, Fran Torres e Mati Bridge (meta suplente).
CALDES: Jordi Pons; Roger Presas, Xavi Gurri, Marcos Blanqué, Marc González (quinteto inicial), Cristian Rodríguez, Pau Cardona, Álvaro Giménez, Dídac Llobet e Jaume Gisbert (meta suplente).
ÁRBITROS: González González e Iglesias Vallina. Expulsaron a Roger Presas con vermello directo por parte do Caldes. Tamén mostraron cartón azul a Marcos Blanqué. No Deportivo Liceo viron o cartón azul Sito Ricart e Àlex Rodríguez.
GOLES: 1-0 (Dava Torres, min. 9). 2-0 (César Carballeira, min. 12). 2-1 (Roger Presas, min. 13). 3-1 (Dava Torres, min. 21). 4-1 (Arnau Canal, min. 30). 4-2 (Roger Presas, min. 40). 5-2 (Àlex Rodríguez, min. 41). 6-2 (César Carballeira, min. 47). 7-2 (Bruno Di Benedetto, min. 49).
Copa do Rei 2023, Cuartos de final. Pavelló Joan Ortoll (Calafell).
