Imaxe: SL Benfica.
O ADN Liceo surxiu outra vez para sumar na casa dun dos mellores equipos do planeta. E con case todo en contra. O Deportivo Liceo de Juan Copa empatou contra o Benfica para acumular seis puntos, baixar ó terceiro posto do Grupo A da Champions pero seguir dependendo de si mesmo na última xornada. Será o 13 de abril, en Riazor e contra o Oliveirense (segundo, 7 unidades). Un triunfo daría o pase á Final 8.
Sen Pol Manrubia na expedición ó tratarse dun cedido do Benfica, a igualdade foi a tónica ó principio duns primeiros 25 minutos decididos por detalles. As ocasións foron abundantes por parte de ambos, con Martí Serra detendo un bo disparo de Nil Roca e outro do exliceíta Roberto Di Benedetto (co casco). Pedro Henriques fixo o propio nun man a man de Dava Torres.
Primeira parte de malas novas
Vital pareceu ser o minuto 12 de xogo, cando Lucas Ordóñez (outro ex verdibranco) foi derrubado polo gardarredes hoxe visitante. Martí viu o cartón azul e Mati Bridge non puido deter o 1-0 de Pablo Álvarez.
O exliceísta Pablo Álvarez anotou o 1-0 tras un cartón azul a Martí Serra
Animados polas boas novas e potenciados pola gran calidade dos seus xogadores, os homes de Nuno Resende dobraron a vantaxe antes do descanso mediante Carlos Nicolía (2-0, minuto 22). Disparo lonxano, golpe no pau e bóla dentro.
Tombita para resurxir
Chegou o segundo acto e non tardou en deixar máis malas novas, aínda que sen consecuencias no marcador. Os colexiados italianos optaron por mostrarlle o cartón azul a Juan Copa e, posteriormente, Ordóñez errou a directa. O partido estivo a piques de morrer aí, pero ocorreu o contrario.
O heroe foi o dorsal 44 e apareceu cando o camiño xa parecía demasiado intransitable. Fran Torres culminou en tan só dous minutos (38 e 39) unha igualada digna do mellor ADN Liceo. Cheos de moral, os verdibrancos tamén tiveron ocasións para remontar. Salvaron á vez as oportunidades do seu rival, que mediante Edu Lamas rozou o 3-2 no 49. Martí Serra evitou a súa definición picada de xeito providencial.
O Liceo intentouno incluso con cinco xogadores de pista no minuto final. Rematou en táboas con todo pendente para o choque na Coruña contra o Oliveirense (13 de abril). O pase será para o vencedor.
FICHA TÉCNICA
BENFICA: Pedro Henriques; Diogo Rafael, Pablo Álvarez, Lucas Ordóñez, Nil Roca (quinteto inicial), Carlos Nicolía, Edu Lamas, Roberto Di Benedetto, Gonçalo Pinto e Bernardo Mendes (meta suplente).
DEPORTIVO LICEO: Martí Serra; Sito Ricart, César Carballeira, Dava Torres, Àlex Rodríguez (quinteto inicial); Bruno Di Benedetto, Arnau Canal, Fabri Ciocale, Fran Torres e Mati Bridge (meta suplente).
ÁRBITROS: Franco Ferrari y Marco Rondina (Italia). Mostraron cartón azul a Martí Serra e ó técnico Juan Copa por parte do Deportivo Liceo.
GOLES: 1-0 (Pablo Álvarez, min. 18). 2-0 (Carlos Nicolía, min. 22). 2-1 (Fran Torres, min. 38). 2-2 (Fran Torres, min. 39).
WSE Champions League 2023, Fase de Grupos, Xornada 5. Pavilhão Fidelidade (Lisboa, Portugal).
