CRÓNICA | ¡Á final! (5-1)

CRÓNICA | ¡Á final! (5-1)

Imaxe: PAOLA PÉREZ.

Nunha demostración de pegada e control, o Deportivo Liceo de Juan Copa superou ó Caldes e accedeu á final da Supercopa de España. O primeiro partido oficial dos verdibrancos na tempada 21/22 deixou múltiples aspectos positivos, pero tamén un camiño. O obxectivo do domingo ás 19:45h é terminar de percorrelo.

A acción comezou ben desde o principio. Ós tres minutos, un despiste defensivo do conxunto de Eduard Candami permitiu anotar a Roberto Di Benedetto (que remataría con molestias nun ombreiro). O don da oportunidade. Pouco despois, César Carballeira (elixido MVP da semifinal) estivo a unha perna de Camps de colocar o 2-0 desde o punto de penalti. Redimiuse lográndoo cun excepcional disparo lonxano.

Marc Grau, cun hábil reverso, foi o responsable dun 3-0 que demostraba claramente a superioridade do Liceo. Non significou aínda así algunha clase de incomparecencia do Caldes, que estivo a centímetros de acurtar distancias cando o descanso era cuestión de minutos.

Pegada e xestión

O regreso á pista do Olímpic de l’Ateneu mostrou a un Caldes máis motivado. Sen nada que perder. Creou problemas e foi capaz, esta vez si, de marcar o 3-1 mediante un bo disparo de Xavi Rovira (minuto 37). Tampouco xogaba a favor o número de faltas do Liceo, vestido totalmente de negro, pero xestionou perfectamente a circunstancia.

Non só iso, senón que golpeou de novo. Jordi Burgaya e Àlex Rodríguez sumaron os seus primeiros goles como liceístas para, dunha vez por todas, finiquitar a semifinal.

O partido polo título celebrarase no mesmo escenario ás 19:45h do domingo. Noia ou Barça, posibles rivais.

FICHA TÉCNICA

DEPORTIVO LICEO: Carles Grau; César Carballeira, Roberto Di Benedetto, Maxi Oruste, Jordi Adroher (quinteto inicial), Marc Grau, Jordi Burgaya, Àlex Rodríguez e Fran Torres.

CH CALDES: Gerard Camps; Sito Ricart, Xavi Rovira, Alex Acsensi, Álvaro Giménez (quinteto inicial), Xevi Gurri, Ferran Rosa, Roger Acsensi e Marcos Blanque.

GOLES: 1-0 (Roberto Di Benedetto, min. 3). 2-0 (César Carballeira, min. 10). 3-0 (Marc Grau, min. 12). 3-1 (Xavi Rovira, min. 37). 4-1 (Jordi Burgaya, min. 47). 5-1 (Àlex Rodríguez, min. 48).

ÁRBITROS: Díaz Cosme e Pérez Claramunt. Mostraron cartón azul a Álvaro Giménez e Sito Ricart, ambos do Caldes.

Semifinal da Supercopa de España 2021. Olímpic de l’Ateneu (Sant Sadurní d’Anoia).

Deixa un comentario