Toca o desprazamento inaugural de 2022. O filial masculino do Deportivo Liceo, inmerso na acción da OK Prata, xogará a undécima data da competición na casa do perigoso Tordera (sábado 22, 20:00h). Será o primeiro partido dos dous como visitante que pecharán o mes de xaneiro, sendo o segundo contra outro gran rival: o recén descendido Mataró.
Os xogadores dirixidos por Sergio Huelves son os actuais sextos clasificados do Grupo Norte con 14 puntos. Veñen como froito de catro triunfos, dous empates e catro derrotas (a última na pasada xornada, 1-4 ante o Sant Feliu).
Dúas unidades máis e dous encontros menos ten o Tordera, segundo clasificado e contendente serio na loita do ascenso. A visita ó Pavelló Parroquial pechará a primeira volta desta OK Prata de 22 xornadas e calendario simétrico.
