30 de xaneiro de 2026
Iago Fouz ‘Pulpi’ nun adestramento. Imaxe: MANU BOUTUREIRA.
O filial do Liceo disputará este domingo en Monte Alto (12:45h) a xornada 16 do Grupo Norte.
O filial do Liceo vai de derbi en derbi. Se a semana pasada tocou enfrontarse en Monte Alto ó Compañía de María, os chicos do Pichu Galvani xogarán este domingo día 1 contra o Club Hockey Oleiros no mesmo escenario (12:45h). O choque corresponderá á xornada número 16 da OK Bronce, dentro do seu Grupo Norte.
Os verdibrancos buscarán neste choque a oportunidade de atopar de novo a senda da vitoria, xa que os últimos catro remataron en empate: Compañía, Mieres, Escola Lubiáns e Santutxu. Todo dentro da novena posición con 17 puntos, cinco menos que o Rochapea (oitavo) e seis máis que o Telecable (décimo). Son un total de catro triunfos, cinco igualadas e seis derrotas para os liceístas ata o momento nesta temporada de regreso á terceira categoría nacional.
Tralo duelo contra o Oleiros tocará sen embargo un parón de 20 días, xa que o seguinte na pista do Urdaneta non se xogará ata o sábado 21 de febreiro (18:00h).
