CRÓNICA | Non hai triunfo sen sufrimento (1-4)

O Deportivo Liceo venceu ó Voltregà nun complicado partido que comenzou perdendo.
WhatsApp Image 2020-11-18 at 21.44.15

Costou, pero que ben soubo. O Deportivo Liceo venceu en Voltregà (1-4) para recuperar parte do traballo perdido pola pandemia de COVID-19, aínda que non foi nada fácil. Dava Torres en dúas ocasións, Adroher e Marc Grau puxeron ó equipo coruñés en puntuación de liderado (21), pero cun encontro menos que o Barcelona e en segunda posición por diferencia de goles.

En palabras de Juan Copa, “o Voltregà é sempre un rival complicado”. O Liceo atopou esta premisa desde o primeiro minuto de partido. Dominou a bóla, pero a solidez defensiva do equipo de Manolo Barceló xerou problemas. Máis aínda cando o Voltregà anotou o gol inicial, obra de Teixidó (minuto 12) de falta directa.

O potencial do Liceo serviu para empatar o partido cinco minutos despois do golpe. Foi Dava Torres, capitán, o responsable dun potente disparo lonxano que superou a Blai Roca. Sen dúbida, o meta do Voltregà foi a gran estrela do seu equipo. Detivo oportunidade tras oportunidade, incluida unha realmente clara a Franco Platero cando o arxentino parecía transformar o segundo gol verde.

Ante un muro chamado Blai Roca

A primeira parte do partido deixou unha exhibición do porteiro local e a segunda non foi menos. Roca ofreceu un amplo catálogo de paradas, pero non puido evitar a remontada do Deportivo Liceo. O 1-2 de Marc Grau foi un tanto importantísimo para os de Juan Copa, bastante máis tranquilos tras lograr darlle a volta ó marcador por segunda xornada consecutiva.

O troco de papeis non detivo o espectáculo do porteiro do Voltregà. Os liceístas acumularon un número considerable de faltas (nove a seis minutos do final), pero unha en concreto do equipo local decantou o partido. O cartón azul de Arnau Canal enviou ao mago Adroher ó punto da falta directa, e tras unha definición de xenio superou o muro de Blai Roca.

Vitoria pechada. Unha realmente importante e complicada. Intentou evitala Manolo Barceló cunha manobra que sorprendeu a propios e estranos, colocando a cinco xogadores de campo nos derradeiros dous minutos de partido. O arriscado movemento non lle xerou bo resultado ó Voltregà, que encaixou o 1-4 definitivo mediante Dava Torres.

Co primeiro reto desta xira por Cataluña xa superado, ao Deportivo Liceo tocaralle xogar o venres ás 20:00h contra o Lloret. A primeira posición estará en xogo.

FICHA TÉCNICA

CP VOLTREGÀ: Blai Roca, Eric Vargas, Gerard Teixidó, Aleix Molas, Arnau Canal (cinco inicial), Roger Font, Marc Palazón, Humbert Serra e Gerard Rovira.

DEPORTIVO LICEO: Carles Grau, Franco Platero, César Carballeira, Dava Torres, Jordi Adroher (cinco inicial), Marc Grau, Nanu Castro e Maxi Oruste.

GOLES: 1-0 (Teixidó, min. 12). 1-1 (Dava Torres, min. 18). 1-2 (Marc Grau, min. 32). 1-3 (Jordi Adroher, min. 44). 1-4 (Dava Torres, min. 49).

ÁRBITROS: Buixeda Gallarte Navales Morera. Mostraron cartón azul ao local Arnau Canal e ao liceísta Maxi Oruste.

INCIDENCIAS: Partido correspondente á xornada 5 da OK Liga 20/21, adiada no seu día pola situación de pandemia. Pavelló Municipal Olivares de la Riva, sen espectadores.

Share on facebook
Share on twitter
Share on linkedin
Share on pinterest

Deixa un comentario