Imaxe: RFEP.
Cero reproches ó Deportivo Liceo trala súa eliminación da Copa da Raíña 2022, responsabilidade dun gran Palau ó que se desafiou sen complexo. Fíxose ata o final, coma sempre neste equipo. A semifinal rematou cun marcador abultado moi pouco representativo do visto na pista.
Con ganas e ilusión, as liceístas loitaron coas súas armas de sempre ante un equipo de enorme potencial. O Palau foi capaz de resistir as ofensivas, xogar co cansancio rival e adiantarse por dúas veces nos minutos 7 e 9. Primeiro fíxoo Laura Puigdueta cunha acción de talento dentro da área de Viki e, posteriormente, Carla Fontdegloria transformou un penalti.
Non eclipsou un bo partido do Liceo, que non estivo tan acertado na finalización como as súas contrarias. Tampouco foi quen de igualar o número de remates dun auténtico grupo de clase mundial. De todas formas, o partido chegou máis que vivo ó descanso e as xogadoras de Stanis foron de menos a máis. A loita debía continuar.
Un resultado demasiado inflado
Así foi. Tanto en defensa como en ataque, o Deportivo Liceo botou o resto. Viki Caretta continuou o seu notable estado de forma con sendas paradas a Fontdegloria e Aina Florenza mentres Bea Gaete, Adriana Soto e María Sanjurjo protagonizaban os achegamentos máis perigosos das verdibrancas.
O Deportivo Liceo, con cinco xogadoras de pista, encaixou dous goles nos instantes finais que inflaron o resultado
A misión continuou viva ata o minuto 49, momento no que a mencionada Florenza logrou batir á meta italiana e sentenciar. Chegaron dous goles máis, ambos responsabilidade de Puigdueta, pero co Liceo arriscando con cinco xogadoras de pista.
Un 5-0 enganoso polo visto durante a acción que non mancha a heroica participación coruñesa na Copa.
FICHA TÉCNICA
HC PALAU: Laura Vicente; Berta Busquets, Laura Puigdueta, Aina Florenza, Carla Fontdegloria (quinteto inicial), Gisela Vicente, Aimee Blackman, Mariona Colomer, Laia Juan e Anna Salvat (meta suplente).
DEPORTIVO LICEO: Viki Caretta; María Sanjurjo, Alba Garrote, Lara Yáñez, Adriana Soto (quinteto inicial), Bea Gaete, Ale Martín, Lucía Yáñez, Cris Diz e Mencía Mosquera (meta suplente).
ÁRBITRO: Raúl Burgos Manotas e Gemma Bravo Ponferrada. Sen cartóns.
GOLES: 1-0 (Laura Puigdueta, min. 7). 2-0 (Carla Fontdegloria, de penalti, min. 9). 3-0 (Aina Florenza, min. 49). 4-0 (Laura Puigdueta, min. 49). 5-0 (Laura Puigdueta, min. 50).
Copa da Raíña 2022, Semifinal. Pavelló Municipal Onze de Setembre (Lleida).
