CRÓNICA | O filial non se rende (5-3)

O OK Prata do Deportivo Liceo vence ó CP Tordera tras ser remontado a falta de seis minutos para o final.
WhatsApp Image 2020-12-08 at 19.58.21

Imaxe: Cristian Fernández.

Vitoria de mérito para o Liceo de Stanis García fronte ó CP Tordera (5-3), despois de responder á remontada do conxunto catalán cunha propia. Estes tres puntos colocan ó filial verde con 17, un menos có líder Sant Just.

O inicio igualado entre o Liceo e o Tordera, presenciado en vivo por Juan Copa e varios xogadores dos “maiores”, foi roto por unha falta directa ós 10 minutos. Permitiu adiantarse ós primeiros. O autor foi Danilo, responsable dun dos goles do primeiro equipo na tempada, que superou ó meta Alain Rivero (a pesar de que Arnau Anglas comezara de inicio). Rozou o empate o conxunto de Xavi González nun man a man, pero Mati Bridge estivo atento.

Sumouse á lista de goleadores outro dos habituais do primeiro equipo: Pablo Parga, autor do 2-0 (minuto 22) tras unha acción embarullada que, en caso de non entrar, probablemente fora catalogada como penalti.

Remontada á remontada

O minuto 32 de partido e o acontecido a partir de entón fixeron honra á tolemia. O visitante Miquel Grau logrou acortar distancias co 2-1 e Danilo estivo a punto de recuperar a vantaxe tras o saque, pero a súa definición pegou no pao. Non errou Jordi Criado, que segundos despois empatou o encontro, e Pablo Torres rozou a remontada. Non puido superar a Bridge, pero si o fixo Eloi Roura (minuto 43) nun lanzamento de penalti.

O Tordera completaba a fazaña momentáneamente, pero Aldo Mejía nivelou o marcador (3-3) de forma instantánea e Fran Torres puxo a guinda co seu gol. Co Tordera xa quemando as naves, Parga sumou o seu segundo tanto particular e estableceu o 5-3 definitivo.

O próximo compromiso do equipo de Stanis García pasará por visitar ó Vilafranca, un dos equipos máis potentes do Grupo Norte da OK Prata. Terá lugar o fin de semana do 12 de decembro.

FICHA TÉCNICA

DEPORTIVO LICEO B: Mati Bridge, Dani López, Carlos Alonso, Nanu Castro, Álex Novoa (cinco inicial), Aldo Mejía, Fran Torres, Pablo Parga e Rubén Martín.

CP TORDERA: Arnau Anglas, Pablo Torres, Albert Ramos, Miquel Grau, Héctor Giménez (cinco inicial), Jordi Criado, Alain Rivero, Eloi Roura, Arnau Bertrán e Albert Hernández.

GOLES: 1-0 (Dani López, min. 9). 2-0 (Pablo Parga, min. 22). 2-1 (Miquel Grau, min. 32). 2-2 (Jordi Criado, min. 33). 2-3 (Eloi Roura, min. 43). 3-3 (Aldo Mejía, min. 44). 4-3 (Fran Torres, min. 47). 5-3 (Pablo Parga, min. 49).

ÁRBITROS: Díaz Sánchez e Mier Sánchez. Mostraron cartón azul a Héctor Giménez por parte do Tordera.

INCIDENCIAS: Partido correspondente á cuarta xornada da OK Plata 20/21 (Grupo Norte). No seu día adiouse pola situación sanitaria. Pavillón de Elviña (A Coruña), 30 espectadores.

Share on facebook
Share on twitter
Share on linkedin
Share on pinterest

Deixa un comentario