CRÓNICA WSE CHAMPIONS LEAGUE (Fase de Grupos, X4) | Un punto trepidante (4-4)

O Deportivo Liceo empata fronte ó Calafell tras unha segunda parte máis que emocionante, suma 5 unidades no Grupo A e accede a postos de clasificación.

Imaxe: MANU BOUTUREIRA.

A emoción trocou en hockey dentro do Pazo dos Deportes da Coruña. Alí empataron Liceo e Calafell na cuarta xornada da WSE Champions League. O seu Grupo A deixa agora mesmo como segundos clasificados ós homes de Juan Copa grazas á derrota do Oliveirense (4) fronte ó líder Benfica (10).

Cálculos aparte, e a pesar do que ocorreu despois, o partido non puido empezar mellor. Ós dous minutos o marcador xa estaba pintado de verdibranco grazas a Dava Torres e un remate pouco ortodoxo. Pase de Pol Manrubia e gol para adiantar ó equipo á vez que espertar o delirio dunhas gradas cheas de liceístas.

No quinto minuto de xogo, Joan Escala viu ademáis un cartón azul que aumentou o susto do Calafell. Sen embargo, Gerard Camps detivo a directa de Rodríguez e tanto el como os seus compañeiros sobreviviron ó power play.

Un segundo a priori chave

O Deportivo Liceo continuou dominando o perigo e demostrouno con dúas ocasións claras de Pol Manrubia e Arnau Canal. Incluso superou un cartón azul a este último. A falta directa de Martí Casas foi atallada por Serra, do mesmo nome, e a inferioridade temporal non causou danos.

Àlex Rodríguez foi chave unha vez máis con dous goles importantes. Imaxe: MANU BOUTUREIRA.

De feito, o descanso chegou con outra gran nova: o gol de Àlex Rodríguez a falta dun só segundo (2-0). Culminou unha contra excelente de todo o equipo e abonouse a marcar nos momentos críticos. Non sería a derradeira vez que o faría durante o encontro.

Unha segunda metade emocionante

A verdadeira emoción chegou nos 25 minutos restantes. Os coruñeses foron capaces de manexar durante dez o golpe moral provocado polo 2-0 e incluso tiveron na man o terceiro tanto. Unha contra de dous para un rematou en nada e, desafortunadamente, o Calafell acurtou distancias xusto despois. Fíxoo Martí Casas, o home gol dos cataláns.

A xogada animou aínda máis ó combativo conxunto de Ferran López, que logrou empatar inmediatamente. Rexeite tras rexeite, Jordi Ferrer plantouse ante Martí e superouno (minuto 38). Sen tempo para reaccionar, unha acción similar rematou no 3-2 de Dava Torres para delirio dos presentes (minuto 39). O partido rompíase.

Imaxe: MANU BOUTUREIRA.

Restaban cinco minutos cando se desatou a tolemia definitiva. Primeiro empatou Humberto Mendes para o Calafell (46’) tras pase da morte e, segundos despois, remontou Arnau Xaus. Sería un golpe mortal se o contendente non fora o Liceo. Juan Copa e os seus xogadores loitaron ata o final, intentáronno con cinco homes de pista e materializaron as boas novas. Àlex Rodríguez, como na primeira metade, marcou (4-4). Esta vez cando o marcador mostraba 12 segundos. Un disparo lonxano que rescatou un importante punto.

Pouco poderá descansar agora o Liceo, xa que en menos de 48 horas regresará outra vez a OK Liga. Este maratón constante de hockey terá a súa vindeira parada de novo en Riazor ante o Alcoi (sábado, 18:30h).

FICHA TÉCNICA

DEPORTIVO LICEO: Martí Serra; César Carballeira, Pol Manrubia, Dava Torres, Àlex Rodríguez (quinteto inicial), Bruno Di Benedetto, Fabri Ciocale, Arnau Canal, Fran Torres e Mati Bridge (meta suplente).

CALAFELL: Gerard Camps; Arnau Xaus, Joan Escala, Martí Casas, Sergi Miras (quinteto inicial), Oriol Palau, Jordi Ferrer, Humberto Mendes, Curro Fernández e Jordi Martínez (meta suplente).

ÁRBITROS: Rui Torres e Pedro Figueiredo (Portugal). Mostraron cartón azul a Arnau Canal e a Fabri Ciocale por parte do Deportivo Liceo. No Calafell víronna Joan Escala e Humberto Mendes.

GOLES: 1-0 (Dava Torres, min. 2). 2-0 (Àlex Rodríguez, min. 25). 2-1 (Martí Casas, min. 36). 2-2 (Jordi Ferrer, min. 38). 3-2 (Dava Torres, min. 39). 3-3 (Humberto Mendes, min. 46). 3-4 (Arnau Xaus, min. 47). 4-4 (Àlex Rodríguez, min. 50).

WSE Champions League 2023, Fase de Grupos, Xornada 4. Pazo dos Deportes de Riazor (A Coruña).

Share on facebook
Share on twitter
Share on linkedin
Share on pinterest

Deixa un comentario